الاصحاب تلقاهم ,,,

الاصحاب تلقاهم ,,, لفرج العشيبي

الاصحاب تلقاهم وقت الشده .... والصاحب اللي بلهون ميت عده


مش كيف بعضهم .... مشكوين منهم والبعض نقرضهم

واصحاب المصالح كلهم رافضهم .... لاجل معاهم غايبه الموده

مستاصل معاهم ماو جديد مرضهم .... وتبين عطابتهم بطول المده

اعطاب في الرفق ديما رقيق غرضهم .... منهم اللي يبخل بمدة يده

الضروف اجبرني والزمان فرضهم .... وحكم الزمان اوقات يصعب رده


بين وبين .... الاصحاب يفرقو منهم عطيب وزين

وهناك م الاصحاب اللي رفقهم شين .... الاندال غردهم تحتاط له لابده

والصاحب اللي بلهون كيف الدين .... عليك حمل زايد اوقات الشده

ما ينتسي ان باتن عليه سنين .... ديما اتفكر فيه كيف اترده

ويقولو الرفق لو طال بين اتنين .... صيوره علي واحد الحمل ايهده

وهناك م الاصحاب الزين هم حدود الزين .... لاعمره رضي بالعيب لايجده

ولا ينزل منازل اللي عفنين ..... عارف حدوده مانهار تعده

يبقالك سند ديما وساس متين .... عليه ينعبي ماكل ريح تهده

لايشحتو لاياكلو بالدين .... اربايت عصر واللي تجيه تسده

معاه العصر ماهو جديد دفين .... قديم وارته من بوه قبل جده

ونختم كلامي بالصلاه عالزين .... شفيع امته يوم حشر وشده